Ekolurra, Euskadiko Nekazaritza eta Elikadura Ekologikoaren Kontseiluak, Sareko jarri du abian, elikadura ekologikoan lan egiten duten ekoizleen bilatzailea. Tresna berri honen bidez, interesa duen edonork modu intuitiboan jakin dezake non erosi elikagai ekologikoak Euskal Autonomia Erkidegoan.

Kontseiluak atzo, irailak 23, aurkeztu zuen bilatzaile hori, Nekazaritza Ekologikoaren Eguna Europar Batasuneko herrialde guztietan ospatzen den eguna. Ekimenak, Ekolurraren arabera, "kontsumitzaile askok egiten duten galderari erantzun nahi dio: non aurki ditzaket bertako ekoizle ekologikoek ekoitzitako elikagaiak"?

Bilatzaile berri hau diseinatzerakoan, ekoizleak zirkuitu motzean merkaturatzen dituzten saltokiei ikusgarritasuna ematea lehenetsi da. Ingurumen- eta ekologia-kontzientzia edo osasunarekiko eta elikadura osasungarriarekiko kezka gero eta garrantzi handiagoa hartu dute gizartearen zati handi batek. Tokiko elikagai ekologikoak funtsezko tresna dira eremu horietan guztietan eragin positiboa izateko. Arazoa da, kasu askotan, produktu horietan interesa duten pertsonek zailtasunak izaten dituztela horiek aurkitzeko.

ENEEK-Ekolurrako lehendakari Judit Garciak azpimarratzen duenez, “garrantzitsua da, alde batetik, ekoizleentzat merkaturatze modu duinenak indartu eta bistaratzea eta, bestetik, kontsumitzaileei merkaturatze modu horiek erabiltzeko erraztasunak ematea”.

Sareko bilatzailearen indargunea

Bilatzaile honen berezitasun nagusia da egileek beraiek zuzenean osatuko duten bilatzailea izango dela. Hau da, informazioa zuzenean iritsiko da kontsumitzailearengana, inguruan dauzkan ziurtatutako ekoizle eta eraldatzaileen eskutik.

Azken hileetan burututako lanari esker, dagoeneko 269 salmenta gune identifikatu dira. Horien artean, azokak, dendak, otar-banaketak, ustiategiak, baserriak, kontsumo-elkarteak… Lurraldeka, banaketa hau da: Araban 43 kokaleku, Bizkaian 70 eta Gipuzkoan 156. Bilatzailea ekoizleek beraiek etengabe elikatu eta eguneratuko dute, helburua kontsumitzaileari ahalik eta informazio gehien eskuragarri jartzea baita.

Bertako elikagai ekologikoen eskaintza zabala da

Bilatzailearen bitartez ere, Euskadin eredu ekologikoan ekoiztu eta euro-hostoaren ziurtagiri ofizialarekin merkaturatzen diren elikagaien aniztasuna ezagutarazi nahi da: haragia, barazkiak, esnekiak, ontziratuak, lekaleak, ogia eta gozogintza, olioa, ardoa, sagardoa, arrautzak… Baita bestelako elikagai berezi batzuk ere, hala nola, gatza, shiitake perretxikoak, kombucha edota pottoka haragia, esaterako.