Amaia Barredo, Eusko Jaurlaritzako Elikadura, Landa Garapen, Nekazaritza eta Arrantza sailburua, "pozik" agertu da Espainiako Senatuak otsoa LESPRE babes bereziko espezieen zerrendatik kanpo uzteko hartutako akordioarekin. Horrela, Vox, PP, UPN, Junts eta EAJ alderdiekin bat egin du, ekimena onartzeko euren botoak batu dituzten indar politikoek.

Onartutako ekimenaren arabera, Senatuak Espainiako Gobernuari eskatzen dio berehala has ditzala Dueroko iparraldean dauden otsoen populazioak Babes Bereziko Araubidean dauden Basaespezieen Zerrendatik (LESPRE) ateratzeko izapideak. Proposamenak aldeko 156 boto (PP, EAJ, Junts, Vox eta UPN), kontrako 92 (PSOE, BNG, Compromis eta Mas Madrid) eta 11 abstentzio (EH Bildu, ERC, Geroa Bai eta Gomera Talde Sozialista) izan ditu, naiz: jakitera eman duenez.

Otsoaren populazio guztiak LESPREn sartzen dituen agindua indargabetzeko eskatzen du ekimenak, eta otso iberikoaren kontserbazio-estrategia berrikustea eskatzen du, egungo erroldetako datuetara egokitu dadin. Ildo horretan, estrategia berri bat onartzeko eskatzen du, autonomia-erkidegoen adostasunarekin.

Testuak, gainera, Bernako Hitzarmenaren jarrera aipatzen du. Hitzarmen horren parte da Europar Batasuna (EB), eta abenduan otsoaren estatusa «erabat babestutik» «babestura» aldatzearen alde bozkatu zuen. Erabaki hori martxoaren 6an sartu zen indarrean. Senatuko Autonomia Erkidegoetako Batzorde Orokorraren iritziz, EBren jarrera berri hori «Espainiako Gobernuaren eta, zehazki, Teresa Ribera ministro ohiaren jarrera egoskorraren guztiz aurkakoa da, eta ez du inolako babes zientifikorik».

Ekimenean adierazi dutenez, otsoa LESPREn sartzearen ondorioa izan da haren populazioa «kontrolik gabe handitzea» eta espezieak abeltzaintzari egindako erasoak. Eskuinaren iritziz, horrek, aldi berean, "muturreko egoera" ekarri du landa-eremuetako biztanleentzat eta, zehazkiago, abeltzainentzat.