Ikerketa bat egin ondoren, Amnesty Internationalek nahikoa elementu aurkitu ditu Israelek okupatutako Gazako Zerrendako palestinarren aurka genozidioa egin duela eta egiten jarraitzen duela ondorioztatzeko, erakundeak aurrekaririk gabeko txosten batean adierazi duenez.

"Izaki penagarriak bagina bezala da: Israelek Gazako biztanle palestinarren aurka egindako genozidioa" txostenak dokumentatzen duenez, 2023ko urriaren 7an Hamasek gidatutako eraso hilgarrien ondoren Israel hegoaldean egin zuen erasoaldi militarrean, Israelek suntsipen-infernu bihurtu ditu Gazako biztanle palestinarrak, inolako lotsarik gabe, etengabe eta erabateko zigorgabetasunarekin.

"Amnesty Internationalen txostenak erakusten du Israelek Genozidioari buruzko Konbentzioak debekatutako ekintzak egin dituela, Gazako biztanle palestinarrak suntsitzeko helburu zehatzarekin. Horien artean daude: Gazako biztanle palestinarrak hiltzea, osotasun fisiko edo mentala larriki kaltetzea eta nahita suntsitzea ekarriko duten bizi-baldintzen mende jartzea. Hilabeterik hilabete, Israelek giza eskubiderik eta duintasunik merezi ez duen talde kaskartzat hartu ditu Gazako palestinarrak, suntsipen fisikoa eragiteko asmoa erakutsiz", azaldu du Agnès Callamard Amnistia Internazionaleko idazkari nagusiak.

"Gure ondorio mingarriek nazioarteko komunitatearen arreta erakarri behar dute: genozidioa da gertatzen ari dena. Amaiera eman behar zaio".

"Une honetan Israeli armak transferitzen jarraitzen duten estatuek jakin behar dute genozidioa eragozteko betebeharra urratzen ari direla eta horren konplize izateko arriskua dutela". Israelen gaineko eragina duten estatu guztiek, bereziki armak ematen dituztenek, hala nola Estatu Batuek eta Alemaniak, baina baita Europar Batasuneko beste estatu kide batzuek, Erresuma Batuak eta beste herrialde batzuek ere, neurriak hartu behar dituzte Israelek Gazako palestinarren aurka dituen ankerkeriak berehala amaitzeko".

Azken bi hilabeteetan, krisia bereziki larria bihurtu da Ipar Gazako gobernazioan, setiatutako biztanleriak goseari, desplazamenduari eta suntsipenari aurre egin behar baitie etengabeko bonbardaketen eta bizi-laguntza humanitarioaren murrizketa itogarrien erdian.

"Gure ikerketak agerian uzten du Israelek hainbat hilabetez ekintza genozidak egiten jarraitu duela, Gazako palestinarrei eragindako kalte konponezinaren jakitun. Egoera humanitario lazgarriari buruzko ohartarazpen kontaezinak eginez eta Nazioarteko Justizia Gortearen erabaki juridikoki lotesleen aurka eginez egin du, Israeli herritar zibil gazatarrei laguntza humanitarioa ematea ahalbidetzeko neurriak berehala hartzea agintzen diotenak", gaineratu du Agnès Callamardek.

"Israelek behin eta berriz esan du Gazan egiten dituen ekintzak legitimoak direla eta Hamas desagerrarazteko helburu militarrak justifikatzen dituela. Baina asmo genozida helburu militarrekin batera existi naiteke, eta ez da zertan Israelen asmo bakarra izan ".