Bertoko ekoizpenaren aldarria egin du Etxaldek baserritarren borroken egunean
Bertoko ekoizpenaren aldarria egin du Etxaldek baserritarren borroken egunean Etxalde Nekazaritza Iraunkorra mugimenduak agerraldi publikoa egin zuen Petritegi sagardotegian joan den apirilaren 17an, Baserritar Borroken Nazioarteko Egunean. Via Campesinaren deiari erantzunez, nazioarte mailan ezkutuan negoziatzen ari diren merkataritza librerako akordioen aurkako ekintzak izan ziren aurtengo ardatz nagusia. Etxaldek dokumentu bat aurkeztu zuen, TTIP edo TAFTA bezala ezagutzen diren akordioek eragingo lituzketen kalteak salatzeko. Horren aurrean, elikadura burujabetza eta nekazaritza iraunkorra aldarrikatu zituen Etxaldek, Euskal Herriko jendarteari bertako produktuen aldeko jarrera eta kontsumoa eskatzearekin batera. elikaherria.cabinet.es webgunean dago ikusgai aipatu dokumentua.
Mikel Hiribarren eta Malu Egiluz baserritarrekin batera, Koldo Nabaskues, EKA kontsumitzaileen elkarteko presidenteak hartu zuen parte komunikabideen aurrean eginiko agerraldian.
Mikel Hiribarren, ELBko kideak eta Confederation Paysanneko bozeramaleak azaldu zuenez, «Europar Batasunak, seguruenik bere burua ahul sentitzen du eta azken bi urteetan AEB eta Kanadarekin tratu ekonomikoak egiten ari da eta gu ere ikutzen gaituzte, gogor, tratu horiek, aintzinako tratuek ikutu gintuzten bezala ».
Tratu hauek Afrika, Hegoamerika eta mundu zabalean kalte egiten dutela nabarmendu zuen, «bereziki elikagaien prezioak asko apaltzen dira, dumpingaren bidez bereziki ». Mundu mailako elikagaien merkatua enpresa handi eta bitartekarien esku dagoela nabarmendu zuen eta normalean horiek erabakitzen dutela laborariei ordaintzen zaiena eta kontsumitzaileek ordaindu beharrekoa.
TTIP edo TAFTAk proposatutako muga sarien erorketak, nekazaritza sektorean %10- 12koak, «ondorio larriak lituzke, adibidez behi haragiaren kasuan». AEBko hustiategien bataz besteko azalerak, 170 hektareak, askoz merkeago eta gehiago ekoiztea ahalbidetuko lieke, «horrek eragina izango luke gure merkatuen orekan, muga sariak keduz gero».
Ingurmena, osasuna eta arlo sozialari loturiko araudian ekarriko lukete kaltea tratu hauek, baita ere. Amerikako Estatu Batuetako araudia nahikoa izango litzateke, «Europako araudi asko ahuldu edo galdu behar lirateke, nahi bezainbat transgeniko, antibiotiko, hormona erabiltzen ahal dira AEBn».
Etxalde mugimenduak apirilaren 17an aurkeztutako dokumentuaren esteka
Informazio gehiago Etxalde aldizkariaren 4. zenbakian, 16-17. orrialdeetan.
Mobilizazioa ezinbestekoa da (Etxaldeko editoriala)
Euskal Herriko Eskubide Sozialen Gutuna sinatzen dugun erakunde sozial eta sindikalok uste osoa dugu gure helburuetarantz aurrera egiteko ezinbesteko mobilizazioa dela, eta martxoaren 14an hitzordu berri bat dugu Iruñean eta Bilbon. Espiritu kritikoa eta proposamenak egiteko gaitasuna duen aliantza sindikal eta sozial indartsu bat artikulatzea ezinbestekoa da Euskal Herrian aplikatzen ari diren politika publikoetan erabateko aldaketa sustatzeko. Gizarte Eskubideen Kartak aurkeztutako gizarte-programak zehazten du zein den erakundeei politika publikoetatik proposatzen diegun aldaketaren norabidea.
Desberdintasunen aurkako jarrerarekin batera, jarduteko konpromiso zehatzak hartu behar dira, aldaketa-elementuak ikusi ahal izateko. Ikuspegi horretatik abiatzen dira Emakume Baserritarren Estatutuaren proiektura aldatzeko proposamenak. Ez da nahikoa artikulu juridiko bat emakume baserritarrenganako izendapenak zuzentzeko. Erakusgarri gisa, esan behar da XXI. mende betean ez dagoela oinarrizko gizarte-zerbitzurik emakumeen osasunaren esparruan (emagina, ginekologoa...), eta hori ez dela estatutu bat onartuta konponduko, arlo publikotik beharrezko baliabideak bideratzen ez badira. Eta hor, konpromiso eta jarduketetan, neurtu ahal izango ditugu aldaketarako borondateak.
Zehazkiago esateko, gure neurketa-makila izaten jarraitu behar dugu, bai kanpo-ekintza, bai barne-ekintza. Eta horretan, zehazki, arduradun politikoek TTIPen (Merkataritza Askearen Tratatua) inguruan kokatu beharko dute tokiko eremutik Europako esparruraino, TTIP-EZ batzarrak proposatutako mozioen bidez. Ez da nahikoa arriskuez edo ondorioez ohartaraztea; beharrezkoa da TTIPa arku politikotik errefusatzeari edo defendatzeari buruzko definizio publikoa ematea. Eta gure mobilizazioen agendak hitzordu berria du apirilaren 17an eta 18an, TTIP gaitzesteko aldarrikapenarekin, bai tokian-tokian, bai nazioartean.
Martxoan eta apirilean ere Argentinara eta Brasilera abiatuko gara, beste esperientzia batzuk ezagutu eta ikasteko eta gure proposamenak zehaztu ahal izateko. Argentinara baserritar gazteen ordezkaritza bat joango da, ekoizpen eta gizarte aldaketa prozesuak ezagutzeko, autoantolakuntzatik, kontsumo arduratsutik eta hiriko gizarte mugimenduarekin dituen aliantzetatik, MNCI gure arrebaren eskutik. Udazkenean, Euskal Herrian harrera egiteko aukera izango dugu. Eta Brasilerantz ordezkaritza zabala eta askotarikoa abiatuko da (mugimendu sozialekin, sindikalekin, tokiko garapenarekin, nekazaritza-erakundeekin eta abarrekin lotutako pertsonak), elikadurarako eskubidearen inguruko politika publikoen aktibazioa eta nekazaritza eta nekazaritza prozesu ekologikoen inplementazioa lehen pertsonan ikusteko, elikadura-subiranotasunerantz.
Mezu-agendak mugimenduz beteta datoz, proposamenez eta ilusioz busti behar ditugu.
Gure Esku Dago.
