"Hiru enpresa handi munduko nekazaritza-hornidura gehienak kontrolatzear daude"

AEBetako eta EBko erregulatzaileek geldiarazten ez badute, hiru enpresak kontrolatuko dituzte hazien ia % 60, pestiziden eta laborantzarako produktu kimikoen ia % 70, elikagaiak eta transgenikoen ia patente guztiak. "Mega-korporazio berri horiek boterea zabalduko dute eta lehiatik kenduko dituzte tokiko enpresa txikiak", ohartarazi du analista batek.

Indiako nekazari batek bere kotoizko laboreak landatzen dituenean, gutxienez % 75eko aukera dago haziak Monsantoren jabetzako enpresa bati erosi behar izateko. Latinoamerikako nekazari batek bere soja transgenikoaren aleak intsektizidatzen baditu, litekeena da produktu kimikoak Bayer enpresa farmazeutiko alemaniarrak edo Dupont enpresa estatubatuarrak saldu izana. Eta nekazari afrikar batek bere arto-soroari produktu kimikoak jartzen dizkionean, litekeena da produktu horiek Suitzako Syngenta enpresatik etortzea.

Duela gutxi arte, nekazaritzako elikagaien sei edo zazpi enpresa ari ziren hazien eta produktu kimikoen merkatuan lehiatzen. Baina Estatu Batuetako eta EBko erakunde arautzaileek hainbat fusio egiteko aukera ematen badute, hilabete gutxiren buruan hiru enpresak soilik kontrolatuko dute munduko hazien ia % 60, elikagaiak lantzeko behar diren pestizida eta produktu kimikoen ia % 70 eta munduko elikagai transgenikoen ia patente guztiak.

Bayer+Monsanto / Dow+DuPont / ChemChina+Syngenta

Gobernuak eta Europar Batasuna une honetan aztertzen ari diren mega-fusioen artean daude Bayer alemaniarrak Monsanto, Estatu Batuetako produktu kimikoen, hazien eta bioteknologiaren enpresa, erostea 59.000 milioi euroren truke; Dow enpresa kimiko estatubatuarrak bere aurkariarekin, DuPont konglomeratuarekin, bat egiteko asmoa; eta Syngenta hazi eta genetika talde suitzarra erosteko ChemChinaren plana, 38.000 milioi euroren truke.