Sindikatuek elkarretaratzea egin dute Bizkaiko Foru Aldundiaren aurrean, Elorrion izandako azken lan-istripu hilgarria salatzeko

Baso-ustiapena da laneko heriotza-tasa handiena duen sektorea

Hainbat sindikatutako ordezkariek elkarretaratzea egin dute gaur Bilbon, Bizkaiko Foru Aldundiaren aurrean, Elorrion izandako azken lan-istripua salatzeko. Mobilizazioan, Administrazioari eta erakundeei eskatu diete neurriak har ditzatela baso-ustiapeneko lanak egiten dituzten langileen lan-segurtasuna bermatzeko.

Zehazki, baso-ustiapenaren sektorea da langile kopuruaren arabera heriotza-tasa handiena duen sektorea, eraikuntzaren aurretik ere. Bertako langile gutxi egon arren, istripu-arrisku handia dago, eta urtero hiltzen dira langileak.

Plantilla txikiak, basoko bakarkako lana, prebentzio-baliabiderik eza, prestakuntzarik eza, lan-tresna desegokiak, malda handiko eremuetako lanak, lan-erritmo oso altuak, horrek eragiten duen nekearekin oso lanaldi luzeak eta abar daude istripuen atzean. Horiek, jakina, jarduerak berak dituen arriskuei gehitutako faktoreak dira.

Etekinak erdietsitako lanaren bidez lortzen diren sektore batean, baliabideetan eta segurtasunean aurrezten da.