Ereindajan Debagoienako baserritarrak eta kontsumitzaileak biltzen dituen proiektua da. Duela bost urte landa eremuko ekoizpen eta kontsumo ereduari buruz hausnartzen hasi ziren eta proposamen eta ideia ezberdinen artean Arrasaten denda bat jartzeari eman zioten lehentasuna. Ibarreko ekoizleen produktuak eta beste produktu batzuk eskaintzen dituen denda ekologikoa iazko ekainean inauguratu zen.
Asier Agirre da Ereindajaneko lehendakaria eta berarekin bildu da Etxalde Nekazaritza Iraunkorra aldizkaria proiektuaren egoera ezagutzeko. Urtea azkar pasatu zaiela eta Ereindajanen martxa "bide onetik" doala azaldu du. Etorkizuna optimista da. www.ereindajan.eus Interneteko ataria da.
Ereindajan dendak duela urtebete ireki zituen ateak Arrasaten, San Juan 2015ean. Asier Agirre da Ereindajaneko presidentea, eta azaldu duenez, esparru gehiagotan sakondu nahi duen proiektua bada ere, dendan jarri dute arreta une honetan. "Kontsumitzaileengandik gertuen zegoen gauza zela ikusten genuen, eta baserritarrei ekonomikoki laguntzeko aukera", nabarmendu du. Denda udan irekitzeak zailtasunak ekarri zituen, baina urritik aurrera martxa asko handitu da.
Irekieran 200 produktu baino ez zeuden eskuragarri, eta orain 800 inguru daude Ereindajan. 100 metro karratuko denda da, eta beste 100 metroko biltegiek osatzen dituzte instalazioak. Bertan denetarik lor daiteke, bai haurrei ipurdia garbitzeko toallatxoak, ardoa edo eguneroko bizitzan etxean behar den oinarrizko beste edozein gauza.
Asteko erosketa
Debagoienetik kanpo ekarritako produktu guztiak ekologikoak dira. Ibarreko ekoizleei dagokienez, Asier Agirrek dio "batzuk eta besteak animatzen" ari direla eta dozena bat baserritar daudela beren produktua hara eramaten. "Gure apustua ibarreko ekoizleei ateak irekitzea izan da. Ekoizle ekologikoak lehenesten ditugu, baina baita tokiko ohiko ekoizleak ere. Ezin diogu bertako baserritar bati ateak itxi, alde batetik, etorkizunean baserritar hori ekologikorantz edo eredu iraunkorrago baterantz joateko aukera dagoelako eta, bestetik, tokiko ekimenak laguntza behar duelako ".
Dendaren erabiltzaileei dagokienez, Aguirre pozik dago jende gehienak astero bertan egiten duelako erosketa, baina oraindik ere gastuak estaltzeko "jauzi" bat emateko beharra ikusten du. Kontuan izan behar da denda kokatuta dagoen egoitza Arrasateko Udalak lagatzen duela hiru urteko epean: "une honetan ez dugu egoitzagatik errentarik ordaintzen, baina kontuak egiterakoan ordainduko bagenu bezala kontatzen dugu, egoera hori ez baita benetakoa gure garaian. Proiektua hiru urteko epearekin hasi dugu, hori guztia errentagarri bihurtzeko. Hemendik bi urtera lokal horretatik atera beharko genuke eta inbertsio bat egin beharko dugu. Dena den, oso norabide onean goaz, apur bat falta zaigu, baina norabide onean ".
Zentzu horretan, kontsumitzaileen eta ekoizleen fideltasuna beharrezkoa izango dela aurreikusten du, "apurka-apurka, hilabetez hilabete, kontsumitzaile eta ekoizle berriak hurbiltzen ari direla ikusten da. Hasiera batean errezeloz hartutako proiektua izan bazen ere, orain aukera gisa ikusten dela esan dezakegu, benetako proiektua delako. Horretan asmatu dugula esan dezakegu ".
Informazio osoa: Etxalde 17.
